Geselskaarte Pak 1 is 'n reeks kaarte vir kommunikasie. Die ontwikkeling van verbale begrip, ekspressie, woordvinding en algemene kennis word geteiken. Die verbetering van geheue-funksie word ook geoormerk, aangesien die pasiënte/kliënte dikwels reeds oor sommige van hierdie kennis beskik het voor bv. hul neurologiese insident en "recall" dus doelbewus gestimuleer word. Hierdie kaarte kan gebruik word tydens terapie met ouer leerders en volwassenes. Temas behels bv. persoonlike vrae, vrae oor huis en tuin, kos, diere, plekke, Suid-Afrika spesifiek asook hoeveelhede en assosiasies. Dis ideaal vir sessies met volwassenes wat kommunikasie geleenthede benodig bv. mense met ligter aantasting van demensie, afasie, geslote hoofbesering, asook diegene wat tegnieke vir vlotheid, duideliker uitspraak of stem wil inoefen. 'n Ander populasie wat daarby kan baatvind is persone met ekspressiewe taalprobleme. Die terapeut selekteer self die kaarte wat sy/hy wil gebruik in die sessie deur die kognitiewe vlak, taalvlak, ouderdom en ander veranderlikes in ag te neem. Hierdie kaartjies kan ook huis toe gestuur word om familie en vriende te betrek by die intervensie. Sommige van die kaarte het 'n Suid-Afrikaanse geurtjie. Die WALC boeke (Workbook Activities for Language and Cognition, Lingui Systems) is ondermeer gebruik om hierdie program op te stel. Ons hoop jul vind hierdie kaarte bruikbaar. Dis die eerste pak van 'n reeks. Ongeveer 75 flitskaarte en 'n gedeelte agterin met moontlike antwoorde ('n tipe memorandum). Daar is gevolglik 97 bladsye om af te laai en/of uit te druk/"print". Terugvoer is welkom.